شحتان واللي معاه رجع للكوت ديفوار باش يوجدو لوطيلات فحالة تأهلو الاسود
مسلسل التسخسيخ باش يوجدو للوفد الاعلامي خدمتو مازال. شحتان واللي معاه رجع للكوت ديفوار باش يوجدو لوطيلات فحالة تأهلو الاسود. جميع المصاريف فلوسها من الجمعية اللي كيرأسها واللي جا يدير السياحة غادي يخرج من المجموعة
كود سبور سان بيدرو
ادريس شحتان رئيس الجمعية المهنية الاكثر تمثيلا للناشرين المغاربة =الجمعية الوطنية للاعلام والناشرين٬ مازال مسخسخ باش الوفد الاعلامي اللي مكلف بتغطية كأس افريقيا للامم بالكوت ديفوار. خلى خدمتو رجع مع خالد الحري امين مال الجمعية والمختار لغزيوي الكاتب العام لنفس الجمعية.
فقد علمت “كود” ان الثلاث رجعو للكوت ديفوار باش يوجدو الاقامة مع النقل للوفد الاعلامي فحالة تأهل الاسود نهار لثلاث فماتش ثمن نهاية كأس افريقيا للامم واللي غادي يلعبوه ضد جنوب افريقيا فملعب سان بيدرو. بعد ما وصلو لابيدجان٬ تنقل شحتان الحري ولغزيوي فنهار واحد من هاد لمدينة لياموسوكرو اللي من المتوقع يلعب فيها المغرب ربع نهاية كأس افريقيا ايلى ربح نهار لثلاث. ضربو 560 كلمتر ذهاب واياب وشافو 3 لوطيلات.
شحتان اللي مكلف بعملية غير مسبوقة ديال الاشراف على تنظيم وفد اعلامي لتغطية “الكان” واللي كيوصل عددهم 140 صحافي وصحافية٬ بغى يشوف بعينيه ويتفادى المفاجأة اللي وقعات فسان بيدرو باش الوكالة اللي كلفوها تقلب على اوطيل ضبرات على فندق خايب قبل ما يتصلح كلشي ويتنقلو الصحافيين يعيشو فظروف مزيانة
اللي ما عارفينوش بزاف منهم صحافيين كاينين فهاد الوفد هو ان ميزانية هاد العملية غير المسبوقة مكلفة بيها جمعية الناشرين: الجمعية الوطنية للاعلام والناشرين. فلوسها ومصاريفها. لا الجامعة الملكية لكرة القدم ولا وزارة الاتصال عندها علاقة بتمويل هاد العملية. فلوس الجمعية اللي فيها كبريات الصحف المغربية.
دابا كاينة اشاعات كيروجوها شي وحدين باللي راه الدولة مخلصة على الصحافيين. كذوب. كون الدولة اللي مخلصة اش دخل الجمعية الوطنية فهاد الفيلم.
شحتان خدا مبادرة تنظيم هاد الرحلة المهنية. شي وحدين لصقو غير فالتوني الموحد اللي فيه اسم “الصحافة المغربية” واللي ما تفرض على حتى شي صحافي٬ بل شي صحافيين ما عمرهم لبسوه. دابا ما كيلبسو حد تقريبا.
غير المبادرة اللي دارها شحتان بحسن نية غادي تعالج شي اختلالات وقعات. فهناك صحافيون معتمدون كاينين فالوفد ما خدمو والو وعاطينها غير للدوران. هادو ما غادينش يبقاو فالوفد. عندهم اعتماد الكاف ولكن يمشيو يضبرو على ريوسهم فالاقامة والنقل والماكلة. يعني عدد من الصحافيين اللي حتالو وجاو يديرو او جاو يخدمو الاشهار مع شي جهة يمشيو يتكلفو بريوسهم.
مستقبلا غادية الجمعية الوطنية للاعلام والناشرين تتكلف بعدد محدود. غادي يكون تقييم للتجربة
